買咗部UPS返嚟，第一件事就係要諗：「究竟擺邊度先最穩陣？」好多香港人地方細，求其搵個窿塞部機入去就算。但其實擺位好講究，擺得唔好，輕則部機唔襟用，重則可能釀成火災。以下係幾個你一定要知嘅擺位貼士。
通風散熱係重中之重
UPS入面舊電池最怕熱。記住一個殘酷嘅數字：
環境溫度一旦高過25℃，每升高10℃，電池嘅壽命就會縮短一半
。香港夏天成三十幾度，如果仲將UPS擺喺密封嘅櫃入面或者檯底焗住，舊電好快就會打柴。理想嘅工作溫度最好維持喺
20℃至25℃
之間。所以，一定要確保擺放位置通風良好，機身嘅出入風口絕對唔可以有嘢阻住。
遠離「三害」：水源、熱源同塵埃
UPS對安裝環境有幾挑剔？首先，要
遠離水源
，例如窗口邊（驚雨水）、廚房、廁所附近呢啲潮濕地方都唔適合。其次，要
避開熱源
，唔好放喺陽光直射嘅地方，或者暖爐、影印機旁邊。最後，要
遠離塵埃
，香港家居同office塵埃唔少，如果部機吸入太多塵，尤其係導電性嘅金屬塵，好容易會短路。
預留足夠空間「抖氣」
唔好將部UPS「揳」到實一實。無論係家用細機定係公司用嘅大機，前後左右都要預留空間俾佢散熱同埋日後做檢查。雖然家用機唔使好似專業機房咁預留成米空間，但至少確保周圍有幾吋空位，唔好俾雜物擋住散熱窿。